立法會秘書處今日帶領議員遊覽立法會唔同地方，參觀圖書館時，有新議員見到「議員特藏」系列，即係專門陳列議員著畀供公眾閱覽嘅地方，同行嘅記者都好奇，究竟超區票王民主黨「鄺神」鄺俊宇嘅暢銷小說有冇機會上架？
鄺神即時笑住話，要寫一本新書叫「有一種幸福，叫CY落台」，醫學界陳沛然就即刻話：「我想要一本，要簽名版本﹗」圖書館代表就話，上架嘅議員著作要係有關香港時事、香港人嗰啲著作，鄺神聽到又話「我即刻出一本﹗」
秘書處又向議員介紹首度公開曝光、近呢個星期先起好嘅立法會歷史牆，呢度主要係做教育用途。另外，一班議員都睇咗立法會新開設、用作教育用途嘅主席椅，全部人敢望而不敢坐，無議員願意坐上個主席位畀記者影相，民建聯周浩鼎笑笑口話「我未夠40歲呀」。阿鼎今次又冇講錯喎，按規定做立會主席真係要40歲架。