(蘋果) 隔牆有耳：立會O Day 新丁遲到早退 鄺神稱為攞證 容E僅留5分鐘

(蘋果) 連結 Link

新一屆立法會下月12日開鑼咯，今屆有成26位新丁議員，隨時喺立法會內迷路兼唔知碇，秘書處特別為此一連3日舉行迎新活動，噚日首場9點就開波，一班新議員好似小學雞咁乖乖上堂，聽吓何謂立法會職能。

一眾立會新丁喺簡報會開始前先影張大合照。李家皓攝

鄺神整證遲到，大合照冇佢份。

影大合照　互派卡片

一如所有學生哥，開學實有人遲到早退，而唔少新丁都係第一次見面，所以迎新之餘都狂派卡片。
醫學界陳沛然噚日早咗半粒鐘到，係最早嘅同學仔，其後社福界邵家臻、尹兆堅同林卓廷、梁頌恆、姚松炎、劉小麗、周浩鼎、柯創盛、劉業強、容海恩、鄭松泰等共15名議員先後到場，並喺會議開始前影大合照。其後唔少人開始交換卡片同電話號碼，例如建制陣營嘅劉業強同吳永嘉，主動向梁頌恆、劉小麗等非建制派握手同派卡片。
遲到好過冇到，有4位議員喺開始咗15分鐘後先到場。家住北區嘅民建聯劉國勳話原定搭7點半巴士，但可能路面有啲擠塞，加上朝早曾巡區見街坊而遲到喎。張國鈞就話佢留咗喺立法會辦公室處理行政等問題。
要入立法會，必須要有證件，遲咗15分鐘嘅民主黨鄺俊宇就話因為被安排去攞臨時證而遲咗；朱凱廸亦喺兩名便衣警員陪同下約15分鐘後先到場。
最終26名新丁中，19人出席朝早簡報會，但唔少人早退，容海恩Eunice喺約5分鐘後聲稱要開會提早離開；尹兆堅則逗留約45分鐘後因為開會早走。朝早接受外媒訪問嘅羅冠聰，下午又加入番迎新大隊。

李八方