【新增影片】笑點嘅嘢，的確唔係人人明白。好似立法會秘書處今日帶班候任議員參觀立法會，途中記者室，「西環新契仔」何君堯見到有報館擺埋頭盔喺度，即刻笑住話：「戰爭狀態喎，頭盔都有埋喎」，民建聯周浩鼎即搭嘴：「哈哈哈哈！啲頭盔係乜嘢作用㗎？」well...鼎，你太年輕了！唔通唔記佔領個陣，立法會外面係幾咁兵荒馬亂？
何、周一唱一和，何君堯再稱：「要去威嘅時候戴嘅！」有記者即刻反駁話係採訪佔領個陣要保護自己用嘅，一班議員「哦！」咗一聲，茅塞頓開。民建聯劉國動仲要加把嘴話：「我送啲靚啲的頭盔畀你哋啦！」不過在場記者認真哽唔落，直接了當話最希望係唔使再戴多次啦。
醫學界嘅陳沛然就「貪得意」戴咗個印住「Press」嘅記者頭盔，佢話佔領個陣加入咗歐耀佳醫生嘅醫療團隊，好彩未食過催淚彈，當時都無戴過頭盔，但之前去工地參觀戴過吓。佢笑住話將來可能比記者仲需要戴頭盔，「我應該危險啲，隨時有人喺我後面掟嘢出嚟」。
一向鍾意行路或者搭電車往返醫院同立法會嘅佢，見到立法會門口有單車泊位即時雙眼發光，話嚟緊考慮用單車代步，來回一程可以由18分鐘大減到8分鐘，咦！咁到時就真係日日都要戴頭盔喎！