專業議政六名成員聯同醫學界議員陳沛然噚日舉辦新春傳媒茶敍，自稱「最溫和」嘅專業議政成員仲好慷慨，齊齊將新年願望送畀娥特；各人自創揮春贈林鄭，大部份人都係叫娥特改改佢自視過高嘅脾性。法律界郭榮鏗、教育界葉建源同社福界邵家臻分別祝娥特「學會謙卑」、「虛懷若谷」，同埋要有「豬般智慧」。
會計界梁繼昌仲好應景地着咗件「黑豬」圖案紅tee，身兼帳委會成員嘅梁繼昌話見盡政府揮霍無度，形容政府特別喺管理工務工程上，表現直頭係佢身上嘅「黑豬」，工程成本上漲、監工又出現問題，投標制度及管理兒戲。之後專業議政同陳沛然仲鬼鬼馬馬，開餐前「劏黑豬」，人哋通常就切燒豬，寓意吉祥，「劏黑豬」儀式係咪寄望林鄭班子改過自新，嚟緊拎返紅豬印仔？