財政司司長陳茂波噚日去立法會宣讀任內第二份財政預算案，太太許步明都有到場支持，仲好有心思咁着咗件綠色衫襯返老公嘅心血結晶，即係嗰本寓意香港係充滿生機嘅土壤嘅粉綠色封面預算案，不過波波嘅手足就似唔太撐場，13位局長到齊，但得八位副局長包括陳帥夫、區志光、徐德義、蔡若蓮、陳浩濂等，同埋兩位政助及兩位行會成員包括周松崗同葉國謙喺觀眾席旁聽，身兼行會成員嘅經民聯議員劉業強仲遲到一粒鐘，成12點先施施然走入會議廳。
黃定光頻閉目養神
波波講足兩粒鐘，唔少議員聽唔夠一半都坐唔定，出晒名係立會睡魔嘅民建聯黃定光都不時閉目養神，大部份人聽聽吓都變咗玩手機，可能忙住轉載預算案消息啩，好似醫學界陳沛然咁，一直碌fb，仲出咗多個post即時短評預算案。
今年嘅預算案和應大灣區規劃同創科發展，但同一時間派糖措施大縮水，許步明離開時被問到畀幾多分老公，有別舊年豎起大拇指盛讚老公首份擔正處理嘅預算案，陳太只係笑笑口冇回應，唔通陳太都唔滿意今年嘅預算案「減糖」？
今年嘅預算案和應大灣區規劃同創科發展，但同一時間派糖措施大縮水，許步明離開時被問到畀幾多分老公，有別舊年豎起大拇指盛讚老公首份擔正處理嘅預算案，陳太只係笑笑口冇回應，唔通陳太都唔滿意今年嘅預算案「減糖」？