(蘋果) 【李八方online】陳沛然點解要同囡囡玩手指？

連結 Link

陳沛然(左一)同張國鈞(右三)同屋企人齊齊亮相講故事節目。(左起陳沛然及三女凱霏、大女凱晴、陳太、二女凱嵐、以及張國鈞二女苡喬、張國鈞、張國鈞大女梓喬及張太。港台提供圖片

呢屆立法會唔少男議員都係湊女公，包括有三個囡囡嘅醫學界陳沛然Pierre，以及有兩個囡囡嘅港島區民建聯張國鈞Horace。趁住「全港兒童故事演講比賽2017」今日開始，港台就邀請呢佢兩位父女檔上陣，一齊喺直播節目講故事。

講故事對Pierre嚟講應該冇乜難度，佢嘅大女、9歲嘅凱晴同二女、6歲嘅凱嵐都鍾意睇英文書，平時一家人出街搭巴士唔睇得書時，就會講古怪故事，而二女爆like搞笑故事，臨瞓前都要佢講嚟笑一笑，而佢都畀囡囡投訴過講嘅故事唔夠特別、唔夠搞笑。Pierre節目中原本solo講一個自私大毛熊嘅故事，囡囡話要一齊講，最終聲演小兔仔。

至於Horace嘅大女梓喬同細女苡喬，分別4歲同3歲，同樣都鍾意睇故事書，佢話囡囡喺佢返屋企時，會排晒隊拎幾本書圍住自己，要佢講故事，大女今日則大讚爸爸講故仔有100分、即係滿分喎。

呢兩位Daddy今日喺節目直播期間都幾忙，皆因要邊講故事邊湊女，兩個幼女都要爸爸抱住，Pierre仲要同細女玩手指，等佢有耐性等到做完節目

張國鈞細囡節目期間都要爹哋抱。

陳沛然就同細女話手指，等佢有耐性等節目完。