(蘋果) 隔牆有耳： 陳沛然講古𠱁囡 反被投訴

連結 Link

 

呢屆立法會唔少議員都係湊女公，包括有3個囡囡嘅醫學界陳沛然Pierre，以及有兩個囡囡嘅港島區民建聯張國鈞Horace。趁住全港兒童故事演講比賽2017噚日開始，港台邀請佢哋父女檔喺直播節目講故事。
講故事對Pierre嚟講應該冇乜難度，佢話9歲嘅大女凱晴同6歲嘅二女凱嵐都鍾意睇英文書，平時一家人出街搭巴士唔睇得書時就會講古怪故事，二女最鍾意搞笑故事，臨瞓前要佢講嚟笑一笑，但佢俾囡囡投訴過講嘅故事唔特別兼唔搞笑。Pierre節目中原本獨自講一個自私大熊嘅故事，囡囡話要一齊講，最終聲演兔仔。

張國鈞俾囡圍

至於張國鈞嘅大女梓喬同細女苡喬分別4歲同3歲，同樣鍾意睇故事書，佢話返屋企時囡囡會排晒隊拎幾本書圍住自己要佢講故事，大女噚日仲大讚爸爸講古仔有100分。呢兩位爹哋喺節目直播期間都幾忙，皆因要邊講故事邊湊女，兩個幼女都要爸爸抱住，Pierre仲要同細女玩手指，等佢有耐性等節目完。