唔經唔覺，立法會議員就職咗個幾月，相信大家大致都分到邊個議員係咩派別。惟獨係醫學界嘅陳沛然（Pierre），既唔話自己係泛民，又堅決否認自己係建制，就連兩派議員都先後加佢入WhatsApp群組一齊用鍵盤議事。不過Pierre今日同八方講，話自己早前「靜靜雞」退出哂兩邊嘅WhatsApp群組喇！
八方聽到都有少少驚訝，有咩原因要放棄溝通機會呢？佢只係話覺得「冇咩意思再留」，至於兩邊傾過啲乜、冇傾過啲乜，佢就封嘴唔講，但就強調唔會影響佢同其他議員嘅關係，又話自己嘅議員助理，同其他議助都有緊密聯繫，唔擔心自己工作上有重大遺漏。
而Pierre成日寫blog都會畀傳媒引用或者報導，不過佢自己就暫時未有整個新嘅facebook page，貼下自己係立法會嘅發言。聽聞佢嘅助理一早剪好哂片，不過現階段因為Pierre仲想親自處理社交平台事務，所以遲下大家先有機會喺網上睇到佢嘅精彩言論。