立法會早前因為宣誓風波，幾乎每周三大會都有「意外」，醫學界議員陳沛然Pierre（圖）因此「大派用場」，上任以來兩次喺大樓內「贈醫」，另有次喺公開活動「外勤」，佢自嘲係「黑仔王」，希望唔使第4度出動，大家平安無事就好咯！
本身係腸胃肝臟科專科醫生嘅Pierre，先後兩次喺立法會「應診」。立法會10月12日首度復會，毛孟靜幫游蕙禎時，混亂中扭傷腰，當時Pierre都有檢查Miss Mo傷勢。今個月2號梁游同保安推撞，輪到6名保安受傷，Pierre話佢原已離開大樓準備攞車趕開會，點知收到某議員急call話好緊急，加上漏咗攞公事包，急急折返先知大鑊，即刻照料受傷保安，送埋佢哋上白車先離開。
另一次「外勤」呢，就喺和平紀念日悼念活動，多達4名在場人士身體不適見暈，Pierre當場施援。