唔少人一聽到689呢三個數字，都會覺得巧京京，估唔到上屆選舉委員會，都有一位689，就係醫學界立法會議員陳沛然嘞！
2011年嘅選委會醫學界選舉結果，5年後睇番其實好有趣。名醫大熱跑出就冇乜特別，當中仲包括當年尚未加入梁班子做局長嘅高永文，以及當時未獲任港大校委會主席嘅李國章㖭！今屆再戰嘅醫學會會長蔡堅則係票王奪1,690票，佔中醫療隊區耀佳當年以853票有一席。而陳沛然當年都有參選但落選，得票仲要689，早過梁特2012年攞到呢個「榮譽」。
向來都靠協商擺平唔少搶位戰嘅鄉議局，上屆28席竟然都有競爭，唔喺協調名單嘅何君堯加入戰團，結果何君堯同另一參選人梁和平同樣61票，靠抽籤決定尾席，最終抽出梁和平，唔知呢啲係咪天意？佢今屆同陳沛然升呢立法會議員，毋須再戰選委會已經自動有一票。