升呢議員後嘅陳沛然，三度變身醫生即場「救」人，佢自嘲係黑仔王喎。
立法會早前因為宣誓風波，幾乎每周三大會都有「意外」，醫學界議員陳沛然Pierre因此「大派用場」，原來上任以來，兩次喺大樓內「贈醫」，另外有次出席公開活動亦要「外勤」，自嘲係「黑仔」，希望唔洗第四度出動，大家平安無事就好咯！
本身係腸胃肝臟科專科醫生嘅Pierre，先後兩次喺立法會「應診」。立法會10月12日首度復會，毛孟靜幫拖未完成宣誓嘅青政游蕙禎時，混亂中扭傷腰部，當時Pierre都有檢查Miss Mo傷勢。
本月2日梁頌恆同游蕙禎因為要入會議室同保安推撞，呢次輪到6名保安受傷，Pierre話佢本來已經離開大樓去攞車，趕去黃竹坑開會，點知收到某議員急call話好緊急，加上漏咗攞公事包，急急折返先知大鑊，即刻照料受傷保安，送埋佢哋上白車先離開。
另一次則係「外勤」，早前喺和平紀念日悼念活動，多達四名在場人士身體不適見暈，議員即時變返醫生，當場施援。唔知大家知唔知？佢個公事包永遠都有個小小急救包，大家有咩頭暈身㷫，不妨打搞下佢喎。