唔少人一聽到689呢三個數字，都會覺得巧京京，估唔到上屆選舉委員會，都有一位689，大家肯肯定估唔到，到底係邊位？八方開估啦，登登登凳，就係現任醫學界立法會議員陳沛然嘞！
睇返2011年嘅選委會醫學界選舉，30席嘅選舉結果，5年後睇返其實好有趣。名醫大熱跑出就冇乜特別，當中仲包括當年尚未加入梁班子做局長嘅高永文，以及當時未獲任港大校委會主席嘅李國章！今屆再戰嘅醫學會會長蔡堅則係票王奪1690票，佔中醫療隊區耀佳當年都以853票有一席。
又其實，剛喺醫學界當選立法會議員嘅陳沛然都有參選，之但係佢當時係落選，而佢嘅得票，嘩嘩嘩，原來係689！！！仲早過梁特攞到呢個「榮譽」，係咪好邪呢？但佢5年後當選做議員，已經自動成為選委會委員，唔使再為投特首嘅呢一票爭凳仔。
講起現任議員上屆落敗選委會，查實唔止陳沛然一個㗎。向來都靠協商擺平唔少搶位戰嘅鄉議局，上屆28席竟然有競爭，唔喺協調名單上嘅何君堯就加入戰團，結果呢，似乎真係有天意。皆因何君堯同另一參選人梁和平都係61票，靠抽籤決定尾席花落誰家，最終抽出梁和平，何君堯當年似乎冇乜運。邊個又估到今時今日，佢成功闖入立法會，穩奪揀特首嘅重要一票？