[蘋果] 隔牆有耳：死撐膠論有理 無視衞署斥造謠 元秋寸專家唔識蒸口罩

Link

全城熱搶新口罩， 亦熱論民建聯立法會議員蔣麗芸建議嘅100度高溫蒸口罩，雖然由醫生到普通市民再到紅十字會等，都話蒸口罩無論「蒸炒煮炸」都唔得，但元秋卻死撐有用，反駁：「你覺得佢哋啱定我啱？」甚至發新聞稿話「有頭髮邊個想做癩痢？有口罩誰人再想翻用？」好似好用心良苦，卻冇批評政府冇派罩惹嚟全城恐慌，衞生署衞生防護中心都頂佢唔順，噚日下午亦喺facebook發文斥「外科口罩洗完蒸完就可以再用」係「謠言」，呼籲市民「唔好信」，難怪噚日人人都重溫前立法會主席曾鈺成金句：「蔣麗芸議員，我建議你少D講無乜用嘅說話……」

黃碧雲：散佈假消息應辭職

查實倡議蒸口罩可行嘅元秋，係衞生事務委員會主席，估唔到佢對「衞生」咁有獨到見解。身為醫生嘅陳沛然噚日劈頭已經話口罩梗係唔蒸得，蒸完咪破壞咗口罩嘅結構，啲菌、病毒咪直出直入？話呢啲根本係普通常識。衞生服務界李國麟都冇元秋咁好氣，佢寸爆元秋可能有佢自己嘅道理，而蒸口罩嘅唯一好處，可能係令蒸籠好賣啲。

而喺衞生panel上，社福界邵家臻就話政府越無能、越多假消息傳播，要求官員澄清口罩蒸完之後係咪可以重用、抑或無論蒸炒煮炸後都唔可以重用？在席嘅衞生署衞生防護中心總監黃加慶回應話，外科口罩都係一次性使用，宣傳指引亦已列明，換言之元秋嘅蒸口罩論係錯啦，邵家臻即時要求元秋收回蒸口罩論，否則辭任主席。民主黨黃碧雲加把口笑話：「主席（蔣）你應該辭職啦！散佈假消息！」

元秋聽到火都嚟，自行狙擊黃加慶，話如果買唔到口罩，喺家中消毒口罩係咪可行，「蒸『100%』水溫得唔得？」黃再指「以我所知無聽過有呢樣嘢」，佢就直指：「我就話畀你知，你自己睇清楚。」到底𠵱家邊個先係專家？

唔止民主派，連新民黨葉劉淑儀都寸元秋嘅蒸口罩論，佢話：「我認為係完全冇科學根據，我自己唔會咁樣做」，不過葉劉講呢番話嘅時候其實係冇戴口罩嘅，甚至喺立法會開會時佢都冇戴罩。葉劉解釋，佢要留番啲口罩喺人多地方、坐公共交通工具時用。有網民就踢爆噚晚同葉劉坐一班機由印尼返香港，都唔見葉劉戴口罩。

蔣麗芸喺facebook轉發咗「蒸口罩」消毒嘅短片後，網民都對佢嘅衞生常識好懷疑。

網民：應去武漢做防疫顧問

面對各界聲討嘅元秋會後拒收回蒸口罩論：「佢哋（批評人士）識乜鬼嘢，你覺得佢哋啱定我啱？你信佢？」其後心有不忿嘅佢仲發新聞稿，引經據典話港大感染及傳染病中心總監何栢良都話2003年沙士期間，就係有醫護人員重複用口罩而受感染，元秋將之演繹為有人重複用未經消毒嘅口罩而受感染，同時又指肺炎病毒喺攝氏56度以上就會被消滅，所以「攝氏100度水溫蒸殺病毒方法絕非不可行」。有個網民好精警：「武漢政府應該請佢做防疫顧問，因為佢仲叻過晒啲醫生和專家。快啲送佢去武漢啦！」相信唔少香港人都拍手歡迎。

李八方