立法會明年7月收爐，收爐前夕都好惹火，皆因民主黨立法會議員許智峯（圖）去年因為不滿保安局派出狗仔隊記錄議員行蹤，喺立法會大樓搶走一名女行政主任手機嘅事件，事後遭建制派動議譴責，仲成立咗調查委員會跟進。委員會噚日朝早再次開閉門會議討論，身為主席嘅工聯會麥美娟會後話委員會已完成搜集資料同研訊工作，開始撰寫報告，希望假期後完成初稿，明年6月前向立法會大會提交報告。
呢個調查委員會嘅報告毋須再提交內務委員會，亦唔會作出建議，但就會提出結論，一如熱血公民鄭松泰2016年喺立法會會議廳倒插國旗同區旗咁，由7名建制派議員組成嘅調查委員會去年提交嘅報告，一致認為泰博當日「行為不檢」同「違反誓言」，報告需交大會辯論同提出譴責動議。
如果調查許智峯嘅報告順利喺明年6月提交，即係可以喺立法會會期完結前交大會辯論同表決。立法會現有67名議員，而譴責動議需三分二在席議員支持先通過，目前民主派議員加上泰博同醫學界陳沛然有24人，建制派唔計按慣例唔投票嘅主席梁君彥就有42人，預料議案獲通過機會唔大，許智峯或大步檻過。