(蘋果) 隔牆有耳：針拮到肉知邊個痛 慢必爆肌壯膽 孕媽容海恩淡定

Link

立法會噚日朝早開會前，先喺宴會廳舉行接種季節性流感疫苗活動，唔少議員都一早到場排隊打針，包括預計年初一就會生BB嘅新民黨容海恩。容海恩打針前後攞牌影相，宣傳準媽媽都可以打流感針，打針期間更一直笑容滿面，唔似部份男議員咁面露痛苦表情，絕對係今日「最佳表情獎」得主。

慢必除咗恤衫，一身肌肉令現場嘩聲四起。

將為人母嘅容海恩容打針期間笑容滿面，仲幫手宣傳準媽媽都可以打流感針。何頴賢攝

醬爆唔執輸

一眾男議員其後把握立法會呢個一年一度「騷肌」機會，當中以近年勤力健身的人民力量「慢必」陳志全最吸睛，因佢一除恤衫，一身肌肉已引來嘩聲四起，連醫學界議員陳沛然都忍唔住上前，捉住佢右手叫佢騷吓老鼠仔，「最佳身形獎」當之無愧，不過慢必打針嗰刻就冇咁威猛，表情仲相當緊張！跟住打針嘅工聯會「醬爆」陸頌雄，疑似見慢必咁受歡迎，有樣學樣除晒衫打針，但做法就被剛入場嘅民建聯陳克勤笑爆：「你唔使除到咁吓話？你喺度做咩嘢啊？」

但今日榮獲「最搞笑大獎」嘅一定係自由黨邵家輝，皆因佢同大台女星馮盈盈現身台慶時一樣「冇打底」，一除咗件外套，恤衫即時「凸點」，連建制派議員何君堯睇到都忍唔住笑笑口講：「叫姑娘畀兩個護貼你吖！」邵家輝其後可能怕醜，選擇低調喺屏風後打針，再着番外套試圖快閃離開，其間有立法會女職員捉住佢問：「你打完針嗱？」笑佢欺場喎！

食衞局局長陳肇始話每年一月至三、四月都係季節性流感高峯期，政府都呼籲巿民接種疫苗，尤其係高危人士要盡快打，包括老人家、長期病患者、孕婦或者小朋友。

李八方