P News: 【世界盃】議員波牛鬥腳法 Pierre醫生揮低各高頭大馬

【世界盃】議員波牛鬥腳法 Pierre醫生揮低各高頭大馬

立法會有隊足球隊，呢班波牛腳法當係勁到可以踢世界盃，但據非正式又唔科學嘅政界口碑，如果以業餘嘅講，都算唔錯喎，最近同領事隊作賽，就一比一握手言和。趁住世界盃熱潮，《蘋果》邀請議員波牛獻技，試下啲波、盤波同射門（係四角同中間都有窿嘅小朋友龍門啫），睇下係咪真係咁架勢？最終勝出嘅係全立會細粒嘅議員喎！

身高1米9嘅民建聯何俊賢係今屆立法會足球隊隊長，掛住呢個名銜，應該被睇好啩，但佢賽前已封後門，自言體能麻麻，速度唔夠快，「有信心過到（關），但肯定唔會好」，結果真係如佢所言，手長腳長似乎唔係優勢，20秒內連續的波唔算標青，8字盤波又有啲論盡，叫佢射門都中龍嘅，但五球入得一次咁多。原來佢年輕時踢波都係後備居多，後衞、前鋒或守龍「唔夠人就我去頂」；點解而家做到隊長㗎？「蜀中無大將，廖化作先鋒……其實做隊長都係主要幫隊員訂下位、安排下泊車啫」。雖然球技唔算勁，但服務人群嘅精神就可嘉。問佢今年捧邊隊攞冠軍？佢睇好德國同比利時，讚前者夠機隊性兼人腳勁，後者都有唔少明星。

雖然都係叫阿強，但工聯會郭偉強當然唔係小志強，冇猛虎射球嗰種威力，但都可以喺龍門側邊掃入，入唔到波時仲跪地抱頭，仿效世界級嘅演出，唔知算唔算值回票價？查實阿強同東區的士大佬有隊波，亦同城大師生組隊，至今續有落場打真軍，所以連續的幾下波都難唔到佢，但盤波就有啲忟水，中間仲一度跌倒「受傷」。佢賽前預告球技中規中矩，至於能否過關？「由於冇操練，所以係唔得嘅」，但深信落場走走趯趯同做社區服務一樣，咁希望佢落區時唔好跌倒嘞。今屆捧盃隊伍，佢都有心水，直言「拳怕少壯」，「法國隊今屆比較青壯啲，比賽完回氣速度會快啲，露活度又大啲，相信都係一個優勢。」

一條「肉」腿好似較佢獻技仲吸晴……都係唔好錯fo住。民主黨尹兆堅唔係立會足球隊成員，但黨友讚佢好波，推薦佢上場，結果的波算唔錯，頭頂胸槌腳踢都有連續性，扭波都算順暢嘅，射波時最初唔多順，捉到路後連環入……當然已經超過五次機會。「無問題吖，實得㗎，慢之嘛」，賽前自我咁樣評估，最終戰果顯示行動都算矯捷，原來佢落場嘅位置都同體型有關，愈細個愈踢得前，細個踢前鋒、中鋒，大咗開始做進攻中場負責派波，唔夠人跑後就踢清道夫、中堅，「終於走唔出做龍門」。鍾意踢波到曾經參加過銀禧甄選，「如果（獲選拔）宜家就係退休球員」。今屆佢話德國有望捧盃，「通常打到八強先嚟料打真軍」。

「覺得（挑戰）有啲難，好似留難議員，盡力試下，哈哈。」被立會同僚認定最好波嘅陳沛然醫生Pierre，獻技前好謙虛，但一落場就上身，連續的波完全無難度，八下十下好輕鬆，叫佢八字盤波，來回幾次唔氣喘又冇甩波。到射門嘞喎，未roll機前佢試玩，連續幾次射入中心，埋位反而有啲失準，但拿捏得準後都有波入，表現一枝獨秀。細細粒嘅佢球技精，或者因為中學年代已經由朝踢到晚，「放學踢到閂門落閘為止」，而家又係醫生隊成員，最記得有次戰術上需要，擺咗佢喺後備，其後佢以後備出場就頂入一球，「全場最矮嗰個頂入，都係幾難忘！」。世界盃每年必睇，憶述巴西世界盃果屆甚至將生活作息時間調至巴西狀態，「巴西晏晝我就食晏」，今年依舊捧盃巴西，若然贏波，應該跳part森巴舞慶祝啦。