隔牆有耳：音波功衝擊 紅帽軍列陣 征服立會怪叔叔

Link

立法會噚日繼續《議事規則》修訂大戰，朝早民主派同建制派繼續刀來劍往之際，其間民建聯「博士」葛珮帆會上聲稱收到通知，有人將用訪客身份進入大樓，「必要時衝擊會議廳」喎，果然喺佢提出「警告」後，真係有一大班頭戴紅帽、身穿紅衫嘅人士，排隊列陣進入立法會，仲輪流被保安檢查隨身行李，葛博士唔通未卜先知？

葉叔叔同小朋友合照嗰陣，田叔叔似乎好羨慕。朱永倫攝

唱完歌仔，葉叔叔同莫叔叔戴埋聖誕帽同小朋友打成一片。

表演前X光搜書包

睇真啲，呢班原來只係立法會秘書處一早安排到訪立法會嘅小學生咋喎，唔通對葛博士嚟講，都好有殺傷力？呢班紅衫軍，好應節地戴上紅色聖誕帽同着紅衫，逐一被保安用X光機搜查書包後，就順利進入立法會地面大堂表演，齊齊唱聖誕歌。
由於撞正立法會《議規》大戰，最初到場嘅立法會議員極少，除咗立法會主席梁君彥外，只有教育界葉建源同醫學界陳沛然同班小朋友合照。
到之後聽歌時，開始有不同建制派到場，包括田北辰同劉業強，民主派則有莫乃光、公民黨楊岳橋、白鴿黨林卓廷、黃碧雲同涂謹申現身，紅衫軍嘅歌聲確實極具「衝擊力」，個個議員開心到陪小朋友一齊跳舞。
而喺聖誕歌聲響徹立法會期間，被逐離會議廳嘅朱凱廸正正就喺紅衫軍嘅上一層，喺歌聲中同大批保安員對峙。

李八方